Хусусий мулк даҳлсизлигининг қонуний кафолати таъминланди
2025 йил 15 май куни
фуқаролик ишлари бўйича Хатирчи туман судининг биносида очиқ суд мажлиси бўлиб,
унда даъвогар Б.Книнг жавобгар Б.Бга нисбатан ўзбошимчалик билан қурилган
биноларни бузиш ва ер майдонидан чиқариш ҳақидаги даъвоси бўйича қўзғатилган
фуқаролик иши мазмунан кўриб чиқилди.
Иш ҳужжатларида мавжуд
маълумотлардан аниқланишича, Ўзбекистон Республикаси Бош прокуратураси
хузуридаги Мажбурий ижро бюроси Хатирчи туман бўлими давлат ижрочисининг 2024
йил 16 январдаги қарорига асосан гаровга қўйилган Б.Бга тегишли бўлган, умумий
ер майдони 1287.0 кв.м, умумий майдони 15.0 кв.м, фойдали майдони 8.36 кв.м,
хоналар сони 2 тадан иборат, кадастр рақами 21:07:01:01:01:4109 бўлган, (26.000.000
сўмга баҳоланган) “Омборхона” биноси сотувга чиқарилган.
2024 йил 9 сентябрь куни ўтказилган электрон-онлайн савдолари
натижалари бўйича расмийлаштирилган ОА-1211634-сонли баённомага кўра аукцион
ғолиби Б.К кадастр рақами 21:07:01:01:01:4109 бўлган мазкур мулкни 95.160.000
сўмга сотиб олган.
Мажбурий ижро бюроси Хатирчи туман бўлими давлат ижрочисининг 2024 йил
11 ноябрь кунидаги қарорига асосан электрон-онлайн савдоси орқали сотилган
кўчмас мулк, Хатирчи туман, “Мустақиллик” МФЙда жойлашган “Омборхона” биноси
даъвогар Б.Кга топширилган.
Хатирчи туман, “Мустақиллик” МФЙда жойлашган умумий ер майдони 1287.0
кв.м, умумий майдони 15.0 кв.м, фойдали майдони 8.36 кв.м, хоналар сони 2 тадан
иборат “Омборхона” биноси ва унга тегишли 1287,0 кв.м ер майдони даъвогар
Б.Книнг номига Давлат кадастр палатаси Хатирчи туман филиали томонидан
18.11.2024 йилда рўйхатдан ўтказилган ва унга мулк ҳуқуқи берилган.
Ўзбекистон Республикаси
Конституциясининг 66-моддасига кўра мулкдор ўзига тегишли бўлган мол-мулкка ўз
хоҳишича эгалик қилади, ундан фойдаланади ва уни тасарруф этади. Мол-мулкдан
фойдаланиш атроф-муҳитга зарар етказмаслиги, бошқа шахсларнинг, жамият ва
давлатнинг ҳуқуқларини ҳамда қонуний манфаатларини бузмаслиги керак.
Ўзбекистон
Респрубликаси Фуқаролик кодексининг 164-моддасига кўра мулк ҳуқуқи шахснинг
ўзига қарашли мол-мулкка ўз хоҳиши билан ва ўз манфаатларини кўзлаб эгалик
қилиш, ундан фойдаланиш ва уни тасарруф этиш, шунингдек ўзининг мулк ҳуқуқини,
ким томонидан бўлмасин, ҳар қандай бузишни бартараф этишни талаб қилиш
ҳуқуқидан иборатдир. Мулк ҳуқуқи муддатсиздир.
Суд юқорида қайд этилган
қонун талаблари ва ишда аниқланган ҳолатларни эътиборга олиб, жавобгар
даъвогарнинг ўз мулкига эгалик қилиш ва фойдаланишга доир ҳуқуқларини бузиб
келгани, ер майдонини бўшатиб бермагани сабабли, даъвонинг жавобгарни ер
майдонидан чиқариш ҳақидаги талабини қаноатлантиришни, жавобгар Б.Бни даъвогар
Б.Кга тегишли бўлган “Мустақиллик” МФЙда жойлашган умумий ер майдони 0,1287 га (1287.0 кв.м ) ер майдонидан
чиқаришни, Хатирчи туман
“Мустақиллик” МФЙда жойлашган умумий ер майдони 0,1287 га (1287.0 кв.м)
ер майдонида қурилган ноқонуний қурилишларни жавобгар Б.Бнинг ҳисобидан бузиб бартараф этиш ҳақидаги хулосага келди.
Бир сўз билан айтганда хусусий мулк даҳлсизлигининг қонуний кафолати
таъминланди.
Бабақулов Баходир,
Фуқаролик ишлари бўйича
Хатирчи туман судининг раиси