Қидирув:

Нотинч ва ажрим ёқасида турган оилалар муҳокамаси бўлиб ўтди  

Навоий вилоят суди ва Навоий вилоят оила ва хотин-қизлар бошқармаси билан ўзаро ҳамкорлик тўғрисида имзоланган Мемарандумга асосан жорий йилнинг 27 сентябрь куни Кармана туманидаги “Уйрот” МФЙ биносида Кармана тумани оила ва хотин-қизлар бўлими бошлиғи Н.Шомиева ва мутахассиси Д.Ҳасанова, Навоий вилоят суди судьяси А.Баҳронов, туман ИИБ масъул ходими М.Туробова, оқила аёллар аъзолари ҳамда 2-сектордаги МФЙ хотин-қизлар фаоллари иштирокида тумандаги оилавий низолари бор, нотинч оилалар билан очиқ мулоқот ва учрашув тадбири ўтказилди.

Тадбирда 6 нафар нотинч оила аъзолари билан индивидуал суҳбатлашиб, никоҳдан ажратишнинг салбий оқибатлари, оила муқаддаслиги ва фарзанд тарбиясига эътиборсиз бўлмасликлари, жиддий асослар бўлмаганда никоҳдан ажрашиш мақсадга мувофиқ эмаслиги тўғрисида тушунтириш ишлари олиб борилди.

Натижада, 1 нафар ажрим ёқасидаги оилалар яраштирилишига эришилди ҳамда қолган 5 нафар оила аъзолари билан кейинчалик яна тушунтириш ишлари олиб бориш бўйича тегишли тавсилар берилди.

 

Азизжон Баҳронов,

Навоий вилоят суди судьяси. 

ҲАМКОРЛИК КЕЛИШУВИ

Таъкидлаш ўринлики, жамиятда қонун устуворлигини таъминлашда, ҳуқуқбузарлик ва жиноятчиликнинг олдини олишда, аҳолининг қонунга ҳурматда бўлиш муносабатини шаклланишида фуқароларнинг ҳуқуқий саводхонлиги ва маданиятининг юқори бўлиши муҳимдир, айниқса бунда ёшларнинг ўрни алоҳида аҳамиятлидир.

Чунки ёшлар ҳар бир жамият ва мамлакатнинг келажагидир. Энг муҳими бугунги кунда ёшларнинг сифатли таълим олиши учун мамлакатимизда барча шароит ва имкониятлар яратилган.

Зарафшон шаҳар судларининг ташаббуси билан ёшларнинг ҳуқуқий билим ва маданиятини янада ошириш, уларда қонунга ҳурматда бўлиш муносабатини шакллантириш, шунингдек ёшлар ўртасида ҳуқуқбузарлик ва жиноятчиликнинг олдини олиш мақсадида Зарафшон шаҳар 8-сонли ихтисослаштирилган давлат умумтаълим мактаби билан ҳамкорлик келишуви ўрнатилди.

Қувонч билан айтиш ўринлики, Зарафшон шаҳрида ҳуқуқий дарс соатларини судьялар томонидан ўтказиб бориш бўйича кўп йиллик тажриба мавжуд бўлиб, мазкур тажриба таълим муассасалари учун анъанага айланиб улгурган.

Таҳлиллардан кузатиш мумкинки, судьяларнинг таълим мактабларида амалий дарс соатларини ўтказиб бориши натижасида ўқувчи ёшларда ҳуқуқ фанларини ўрганишга бўлган қизиқишлари ортган ва келажакда ҳуқуқшунос бўлиши истагини билдираётган ўқувчилар сони кўпайган. 

Албатта, устоз-мураббийларнинг яқиндан ёрдами, ўқувчи ёшларнинг қизиқиши судьялар учун ҳам куч-қувват бўлиб хизмат қилаётганлиги ҳам, айни ҳақиқат.

Тадбир сўнгида, ҳамкорлик келишуви доирасида судьялар томонидан ҳуқуқий дарс соатлари ўзаро тасдиқланган жадвалга асосан ҳам назарий, ҳам амалий шаклда тизимли равишда ўтказиб борилиши келишиб олинди.

 

Шерзод Ғофуров,

Зарафшон туманлараро иқтисодий суди раиси.

2024 йилнинг 9 ойи мобайнида Навоий вилояти судлари томонидан давлат органлари ва ташкилотлари, уларнинг мансабдор шахсларининг ноқонуний чиқарилганлиги учун ҳақиқий эмас деб топилган қарорлари тўғрисида расмий маълумот

2024 йилнинг 9 ойи давомида Навоий вилоят ҳамда туманлараро маъмурий судлари томонидан 679 та (2023 йилнинг 9 ойида эса 719 та) оммавий-ҳуқуқий муносабатлардан келиб чиқадиган низолар билан боғлиқ маъмурий ишлар кўриб тамомланган, кўриб тамомланган ишлардан 390 (582 та) таси қаноатлантирилган, 203 (97) таси рад қилинган, 45 (17) таси иш юритишдан тугатилган ҳамда 41 (23) та ариза кўрмасдан қолдирилган.

Кўриб тамомланган маъмурий ишларнинг 31 таси (155 таси ёки 21,5%), яъни 4,6% сайёр суд мажлисларида кўриб тамомланган.

Оммавий-ҳуқуқий муносабатлардан келиб чиқадиган низолар бўйича кўриб тамомланган айрим ишларни тоифалар кесимида таҳлил қиладиган бўлсак:

– Ҳоким қарорини ҳақиқий эмас деб топиш ҳамда маҳаллий ҳокимлик мансабдор шахсларининг харакати (ҳаракатсизлиги)ни қонунга хилоф деб топиш ҳақида 70 та кўрилган, шундан 29 таси қаноатлантирилган, 32 таси рад қилинган, 4 таси иш юритишдан тугатилган ҳамда 5 та ариза кўрмасдан қолдирилган.

– Бюджетдан ташқари пенсия жамғармаси қарорларини ҳақиқий эмас ҳамда мансабдор шахсларининг харакати (ҳаракатсизлиги)ни қонунга хилоф деб топиш ҳақида 266 та кўрилган, шундан 244 таси қаноатлантирилган, 11 таси рад қилинган, 7 таси иш юритишдан тугатилган ҳамда 4 та ариза кўрмасдан қолдирилган.

– Солиқ органи қарорларини ҳақиқий эмас ҳамда мансабдор шахсларининг харакати (ҳаракатсизлиги)ни қонунга хилоф деб топиш ҳақида 73 та кўрилган, шундан 23 таси қаноатлантирилган, 38 таси рад қилинган, 5 таси иш юритишдан тугатилган ҳамда 7 та ариза кўрмасдан қолдирилган.

– Ўзбекистон Республикаси Бош прокуратураси ҳузуридаги мажбурий ижро бюроси қарорларини ҳақиқий эмас ҳамда мансабдор шахсларининг харакати (ҳаракатсизлиги)ни қонунга хилоф деб топиш ҳақида 85 та кўрилган, шундан 15 таси қаноатлантирилган, 43 таси рад қилинган, 13 таси иш юритишдан тугатилган ҳамда 14 та ариза кўрмасдан қолдирилган.

– Нотариал ҳаракатни амалга ошириш рад этилганлиги ёки нотариуснинг ҳаракатлари (ҳаракатсизлиги) юзасидан 20 та кўрилган, шундан 18 таси қаноатлантирилган ҳамда 2 таси иш юритишдан тугатилган.

Суд таъсирчанлиги фаолияти бўйича:

Навоий вилоят ва туманлараро маъмурий судлари томонидан 2024 йилнинг 9 ойи давомида ишларни кўриш жараёнида аниқланган қонунбузилиш ҳолатлари юзасидан айбдор мансабдор шахсларга нисбатан барча инстанцияларда жами 149 (230) та хусусий ажримлар чиқарилган бўлиб, уларнинг 133 таси бўйича жавоблари олинган, қолганлари бўйича қонунда белгиланган муддатлари мавжуд.

Мурожаатларни қабули бўйича:

Бундан ташқари Навоий вилоят ва туманлараро маъмурий судлари томонидан 142 та ёзма мурожаатлар мазмун кўриб ҳал қилинган, 156 та фуқаро сайёр қабулларда ҳамда 565 та фуқаролар бевосита суд идорасида қабул қилинган.

 

Навоий вилоят суди матбуот хизмати.

Оила муқаддас даргоҳ уни асранг дўстлар

Навоий шаҳридаги «Матонат” маҳалласида “Биз оилавий ажралишларга қаршимиз” шиори остида фуқаролик ишлари бўйича Навоий вилоят судининг судьялари, туман Оила ва хотин-қизлар бўлими ҳамда бошқа масъул мутасаддилар ҳамкорлигида ажрим ёқасига келиб колган оилалар муҳокамаси бўлиб ўтди.

Мукокамаларда махаллаларда ажрим ёкасида турган оилалар яраштирилди. Жумладан, жараёнда 6 нафар оила иштирок этиб, уларнинг 3 нафари яраштирилди,  2 нафарига муҳлат берилди, 1 нафар оилага тегишли хулосалар берилди.

 Оилавий ажримлар ҳамда уларда учраётган зуравонлик сабаблари аниқлашиб, уларни бартараф этишга қаратилган ёндашув самарали натижа берди.

 

Беҳзод Шерматов,

Навоий вилоят судининг судьяси.

Оила – муқаддас даргоҳ

“Навоий кон-металлургия комбинати” АЖ Марказий кон бошқармаси ишчи-ходимлари учун “Оила мустаҳкамлиги ва масъулияти, оилавий ажримлар ҳамда уларни олдини олиш” мавзусида тарғибот тадбири бўлиб ўтди.

Мазкур тадбирда Зарафшон шаҳар ҳокилиги масъуллари, шаҳар имом хатиби, Зарафшон туманлараро иқтисодий суди раиси Ш.Ғофуров, жиноят ишлари бўйича Томди туман суди раиси Д.Ергашева ҳамда фуқаролик ишлари бўйича Зарафшон туманлараро суди раиси Ш.Очиловлар иштирок этишди.

Тадбир иштирокчилари томонидан оилада ижтимоий-маънавий муҳитнинг барқарор бўлиши, фарзанд тарбиясида ота-она ўрни беқиёс эканлиги, оила инсон учун муқаддас даргоҳ ва ҳаётий ибрат мактаби эканлиги тўғрисида фикр-мулоҳазалар билдирилди.

Шунингдек, тадбир давомида «Фарзанд омонат» номли қисқа метражли видео филм намойиш этилди.

Тадбир сўнгида эса иштирокчилар ўзларини қизиқтирган саволларга соҳа мутахассислари томонидан жавоб олишди.

 

Шерали Очилов,

Фуқаролик ишлари бўйича Зарафшон туманлараро суди раиси.

Навбаҳор туманлараро иқтисодий суди биносида тўловга қобилиятсизлик тўғрисидаги иқтисодий ишлар, уларнинг суд томонидан кўриб чиқилишида вужудга келаётган мавжуд муаммолар ва уларнинг ечими бўйича давлат активларини бошқариш агентлиги, солиқ органи масъул ходимлари, тугатиш бошқарувчилари иштирокида семинар ўтказилди

Ушбу семинарда иқтисодий судларда тўловга қобилиятсизлик тўғрисидаги ишларнинг кўриб чиқилишида вужудга келаётган мавжуд муаммолар ва уларнинг ечими, “Тўловга қобилиятсизлик тўғрисида”ги Ўзбекистон Республикаси Қонунининг мазмун моҳияти ва аҳамияти тўғрисида тушунтиришлар берилди.

Ўзбекистон Республикаси Иқтисодий процессуал кодексининг 25-соддасига кўра, тўловга қобилиятсизлик тўғрисидаги ишлар иқтисодий судга таааллуқли бўлиб ҳисобланади. Иқтисодий процессуал кодексининг 210-моддасига кўра, юридик ва жисмоний шахсларнинг, шунингдек якка тартибдаги тадбиркорларнинг тўловга қобилиятсизлиги тўғрисидаги ишлар ушбу Кодексда назарда тутилган қоидалар бўйича, «Тўловга қобилиятсизлик тўғрисида»ги Ўзбекистон Республикаси Қонунида  (кейинги ўринларда Қонун деб юритилади) белгиланган ўзига хос хусусиятлар эътиборга олинган ҳолда суд томонидан кўриб чиқилади.

Қонуннинг 3-моддасига мувофиқ, тўловга қобилиятсизлик — суд томонидан эътироф этилган, қарздорнинг пул мажбуриятлари бўйича кредиторлар талабларини тўла ҳажмда қаноатлантиришга ва (ёки) солиқлар ҳамда йиғимлар бўйича ўз мажбуриятларини тўла ҳажмда бажаришга қодир эмаслиги ҳисобланади.

Навбаҳор туманлараро иқтисодий судида ҳозирги кунда жами 22 та Тўловга қобилиятсизлик иши юзасидан тугатишга доир иш юритиш таомили қўлланилиб, тугатиш ишлари олиб борилмоқда. Шундан бир йилдан ошган тўловга қобилиятсизлик ишлари 1 та, 9 ойдан ошган ишлар 3 тани ташкил этади.

 Қонунга мувофиқ,  тўловга қобилиятсизлик тартиб-таомилларини ўтказиш учун суд томонидан тайинланадиган шахслар суд бошқарувчилари томонидан амалга оширилади.

Қонуннинг 22-моддасига кўра, олий маълумотга ҳамда камида икки йиллик иш стажига эга бўлган, шунингдек ваколатли давлат органида аттестациядан ўтган шахслар суд бошқарувчилари этиб тайинланиши мумкин.

Қонуннинг 23-моддасига кўра, суд бошқарувчиси кредиторлар йиғилишини чақиришга, ушбу Қонунда назарда тутилган ҳолларда кредиторлар қўмитаси чақирилишини талаб қилишга, олдиндан давлат божи тўламай туриб, даъво аризалари ва бошқа аризалар билан судга мурожаат этишга, ушбу Қонуннинг 26-моддасига мувофиқ ҳақ олишга, бошқа шахсларни улар фаолиятига қарздорнинг маблағлари ҳисобидан ҳақ тўлаган ҳолда, агар кредиторлар билан тузилган битимда бошқача қоида белгиланган бўлмаса, шартнома асосида жалб этишга, давлат хизматларидан, шу жумладан давлат хизматлари марказлари орқали кўрсатиладиган хизматлардан олдиндан ҳақ тўламасдан фойдаланишга, қарздорнинг мулки, ҳисoбвaрaқлaри вa депозитлaри, шу жумлaдaн крeдит кaртaлари, электрон баланслaри вa электрон пул ўткaзмaлaри тўғрисидa жисмоний вa юридик шaxслaрдан (шу жумлaдaн крeдит тaшкилoтлaридaн) ҳамда дaвлaт oргaнлaридaн бепул ахборот oлишга, қарздор жисмоний шахсдан унинг жисмоний шахснинг қaрзини таркибий жиҳатдан ўзгартириш рeжaсини aмaлгa oширишга доир фaoлияти тўғрисидaги ахборотни сўрaб олишга, ўз зиммасига юклатилган мажбуриятларни бажариш учун давлат солиқ хизмати ва божхона органларидан, бюджетдан ташқари жамғармалардан, кўчмас мулкка оид ҳужжатларни рўйхатдан ўтказувчи органлардан ҳамда қарздор корхона ва унга тегишли мол-мулк тўғрисида зарур ахборотга эга бўлган бошқа ваколатли органлардан ахборот олишга, ўз вазифаларини бажаришни муддатидан илгари тугатиш тўғрисида судга ариза беришга ҳақли.

Суд бошқарувчиси қарздорнинг мол-мулки бут сақланиши юзасидан чоралар кўриши, кредиторларнинг талаблари реестрини шакллантириши ва юритиши, қарздорнинг молиявий аҳволини таҳлил қилиши, қарздорнинг молиявий аҳволи ва (ёки) ўз фаолияти тўғрисидаги ахборотни кредиторнинг талабига кўра ўн кунлик муддатда тақдим этиши, сохта тўловга қобилиятсизлик, тўловга қобилиятсизликни яшириш ёки қасддан тўловга қобилиятсизликка олиб келиш аломатларини аниқлашга доир ҳаракатларни амалга ошириши ва чоралар кўриши ҳамда бундай аломатлар аниқланганлиги ҳақида кредиторлар йиғилишига, судга, ваколатли давлат органига, шунингдек ҳуқуқни муҳофаза қилувчи органларга хабар бериши, қарздор жисмоний шахснинг қарзини таркибий жиҳатдан ўзгартириш режасининг бажарилиши устидан назоратни амалга ошириши, қарздор жисмоний шахс томонидан кредиторларнинг талаблари тўла ҳажмда қаноатлантирилиши учун маблағларнинг ўз вақтида тўлиқ тўланишини назорат қилиши, суд ҳужжатлари билан ўз зиммасига юклатилган вазифаларни бажариши шартлиги белгиланган.

Шунингдек, семинар давомида суд бошқарувчилари томонидан мавжуд банкротлик ишларини ўз вақтида якунлаш, оралиқ ҳисоботларни тақдим этиб бориш, хулосаларни белгиланган муддатларда тақдим этиш, қонунда белгиланган нормаларга тўлиқ риоя этиш, давлат активларини бошқариш агентлиги Навоий вилоят худудий бошқармаси суд бошқарувчилар фаолиятини назорат қилиб бориш лозимлиги тўғрисида тушунтиришлар берилди.

 

Бекзод Джумаев,

 

Навбаҳор туманлараро иқтисодий суди раиси.

Судья ва ёшлар учрашуви мобайнида амалий дарс машғулоти ўтказилди

Жиноят ишлари бўйича Қизилтепа туман суди раиси А.Авезов томонидан Қизилтепа туманидаги 1-сонли мактабда «Ҳуқуқбузарлик тушунчаси» мавзусида амалий дарс машғулоти отказилди.

Ушбу тадбир ўқувчи ёшларнинг ҳуқуқий билим ва маданиятини янада ошириш, уларда қонунга ҳурматда бўлиш муносабатини шакллантириш, шунингдек ёшлар ўртасида ҳуқуқбузарлик ва жиноятчиликнинг олдини олиш мақсадида ташкил этилди.

Мазкур учрашув давомида ўқувчи ёшларларнинг ҳаётда ўз ўринларини топишлари, соғлом турмуш тарзини ташкил қилиш ва ёт ғояларга берилмаслик борасида зарур маслаҳатлар бериб ўтилди ва бу борада суд амалиётидан мисоллар келтирилди.

Ҳуқуқий дарс соати жараёнида янги таҳрирдаги Конституциямизнинг аҳамияти ҳамда инсон ҳуқуқ ва эркинликларини таъминлашдаги ўзига хос жиҳатлари, шунингдек жамиятда инсон ҳуқуқларининг ўрни мавзусининг мазмун-моҳияти ўқувчи ёшларга тушунтириб ўтилди ҳамда уларнинг саволларига амалиётчи мутахассис томонидан тушунтириш берилди.

 

Адиз Авезов,

Жиноят ишлари бўйича Қизилтепа туман суди раиси.

Сайёр тарзда ўтказилган қабул

Фуқароларнинг судларга бўлган мурожаатларини улар учун қулай бўлган жойда қабул қилинишини таъминлаш, суд-ҳуқуқ тизимидаги ислоҳотлар, қонунчиликка киритилган ўзгартиришлар ва уларнинг мазмун-моҳиятини аҳолига тушунтириш, шунингдек “Менинг маҳаллам-менинг судьям” ғояси остида Зарафшон шаҳридаги “Қурувчи” МФЙда сайёр учрашув ташкил этилиб, аҳолининг мурожаатлари тингланди ва уларга ҳуқуқий тушунтиришлар берилди.

Шунингдек, қабул жараёни ҳуқуқий тарғибот тадбири билан давом этиб, унда фуқаролар ва тадбиркорлик субъектларининг ҳуқуқлар ва қонуний манфаатларини бузилиши ҳолатларини олдини олиш, ўзбошимчалик билан ерларни эгалламаслик ва ноқонуний равишда бино қурмаслик лозимлиги ҳамда бу каби хатти-ҳаракатлар учун қонунчиликда белгиланган жавобгарлик ва жазо чоралари юзасидан тушунтиришлар бериб ўтилди.

 

Шерзод Ғофуров,

Зарафшон туманлараро иқтисодий суди раиси.

Таъсисчи нега таъсисчилар сафидан чиқарилмади

Иқтисодий суд ишларини юритишнинг муҳим вазифаларидан бири иқтисодиёт соҳасида корхоналар, муассасалар, ташкилотлар ва фуқароларнинг бузилган ёки низолашилаётган ҳуқуқларини ёхуд қонун билан қўриқланадиган манфаатларини ҳимоя қилишдан иборатдир.

Мазкур вазифаларни амалга оширишда ўз зиммасида ўлкан масъулият ва жавобгарлик мавжудлигини ҳар бир судья чуқур ҳис қилади, албатта.

Ўзбекистон Республикаси Иқтисодий процессуал кодекси (бундан буён матнда ИПК деб юритилади)нинг 32-моддасида, Қорақалпоғистон Республикаси суди, вилоятлар ва Тошкент шаҳар судлари тарафлардан бири Ўзбекистон Республикаси норезиденти — чет эл шахси бўлган ишларни кўриши назарда тутилган.

Навоий вилоят суди иқтисодий ишлар бўйича судлов ҳайъатида Ўзбекистон Республикасининг норезидентига оид кўрилган қуйидаги иқтисодий иш юзасидан ҳам даъвонинг қанчалик асосли эканлигини тўпланган объектив далилларга ҳуқуқий баҳо бериб, якуний тўхтамга келиш талаб этилар эди.

Хусусан, даъвогар “NUROTA-JIN PENG” масъулияти чекланган жамияти таъсисчиси LUI QINGHU (бундан буён матнда даъвогар деб юритилади) судга даъво аризаси билан мурожаат қилиб, унда жавобгар “NUROTA-JIN PENG” масъулияти чекланган жамияти таъсисчиси Ражабов Ғайрат Асадовични (бундан буён матнда жавобгар деб юритилади) таъсисчилар сафидан чиқаришни сўраган.

Аниқланишича, 2020 йил 18 августда Нурота туман Давлат хизматлари маркази томонидан 881970-сонли реестр рақами билан қайта рўйхатга олинган МЧЖ Низомига мувофиқ МЧЖнинг Низом жамғармаси 400.000.000 сўмни, шундан таъсисчи Ражабов Ғайрат Асадовичнинг улуши 120.000.000 сўм (ёки 30 фоиз)ни, Lui Qinghuнинг  улуши 280.000.000 сўм (ёки 70 фоиз)ни ташкил этган.

“Масъулияти чекланган ҳамда қўшимча масъулиятли жамиятлар тўғрисида”ги Ўзбекистон Республикаси Қонуни  8-моддасининг иккинчи қисмига мувофиқ жами улушлари жамият устав фондининг (устав капиталининг) камида ўн фоизини ташкил этадиган жамият иштирокчилари ўз мажбуриятларини қўпол бузаётган ёхуд ўз ҳаракатлари (ҳаракатсизлиги) билан жамиятнинг фаолият кўрсатишига имкон бермаётган ёки уни жиддий тарзда қийинлаштираётган иштирокчини жамиятдан суд тартибида чиқарилишини талаб қилишга ҳақлидирлар.

Даъво аризасида МЧЖ таъсисчиси Ғ.Ражабовни МЧЖ таъсисчилари сафидан чиқариш учун таъсисчи Ғ.Ражабов томонидан устав фонди шакллантирилмаганлиги асос сифатида кўрсатилган.

МЧЖ нинг 2020 йил 18 августдаги 1-сонли умумий йиғилиш баённомаси билан “NUROTA-JIN PENG” масъулияти чекланган жамияти таъсис шартномаси тасдиқланган.

Таъсис шартномасининг IV-бўлимида иштирокчиларнинг улушни киритиш бўйича мажбуриятларини бузганлик учун жавобгарлик белгиланган бўлиб, унга кўра улушини тўлиқ киритмаган иштирокчи жамиятнинг мажбуриятлари бўйича ўз улушининг тўланмаган қисми доирасида солидар жавобгар бўлиши белгилаб қўйилган.

Бироқ, таъсисчилар ўртасида тасдиқланган таъсис шартномасида, улушини тўлиқ киритмаган иштирокчи таъсисчилар сафидан чиқарилиши белгиланмаган.

Даъвогар даъво аризасида жавобгар томонидан устав фондини шакллантириш учун ҳеч қандай улуш шаклидаги пул маблағи ёки мол-мулк киритмаганлигини важ қилиб кўрсатган бўлсада, лекин банклар томонидан берилган маълумотларда жавобгар Ғ.Ражабов  устав фондини шакллантириш учун жами 4.603.000 сўм пул маблағлари киритганлиги кўрсатилган.

Даъвогар томонидан эса 280.000.000 сўм устав фондига киритилиши лозим бўлсада, бироқ даъвогар ҳам устав фондини шакллантириш учун 144.381.507 сўм киритиб, у ўзига тегишли қисмини тўлиқ бажармасдан судга даъво аризаси билан мурожаат қилган.

Қайд этилганлардан ташқари даъвогар даъво аризасига асос қилиб, жамият фаолиятига оид муҳим масалалар юзасидан бир қатор йиғилишлар ўтказилганлиги, жавобгар ушбу йиғилишда иштирок этмасдан жамият манфаатларига жиддий зиён етказиб, жамиятнинг фаолият кўрсатишига жиддий тарзда тўсиқ бўлаётганлигини кўрсатган.

Бироқ, судга даъвогар вакили жамиятда ўтказилган йиғилиш баённомалари, йиғилишларга жавобгар келмасдан тўсиқ бўлганлиги ҳолатлари бўйича тегишли ҳужжатларни тақдим этмаган ҳамда иш ҳужжатлари ўрганилганда ҳам мазкур ҳужжатлар аниқланмаган.

ИПК 68-моддасининг биринчи қисмига мувофиқ, ишда иштирок этувчи ҳар бир шахс ўз талаблари ва эътирозларига асос қилиб келтираётган ҳолатларни исботлаши керак.

Хусусан, МЧЖ таъсисчиси Ғ.Ражабовни МЧЖ таъсисчилари сафидан чиқариш учун унинг МЧЖ Таъсис шартномасида ёки Низомида белгиланган айнан қайси мажбуриятни бажармаётганлиги, ўз мажбуриятларини қўпол бузаётганлиги ёхуд ўз ҳаракатлари (ҳаракатсизлиги) билан МЧЖнинг фаолият кўрсатишига имкон бермаётганлиги ёки уни жиддий тарзда қийинлаштираётганлиги, таъсисчи Lui Qinghuнинг ўзи 70 фоиз устав фондини тўлиқ шакллантирмаган бир пайтда 30 фоиз улушга эга бўлган Ғ.Ражабов томонидан устав фонди агар тўлиқ шакллантирилмаган бўлса МЧЖ фаолиятига қандай таъсир кўрсатиши тегишли далиллар билан исботланмаган.

Юқорида келтирилган ҳолатларга кўра, суд даъво талабини асоссиз деб баҳолаб, қабул қилинган ҳал қилув қарори билан даъвогарнинг жавобгарга нисбатан таъсисчилар сафидан чиқариш ҳақидаги талабини қаноатлантиришни рад этиб, низо юзасидан қонуний ва асосли қарор қабул қилиниши таъминланди.

 

Лутфулло Тошмуродов,

Навоий вилоят судининг иқтисодий ишлар бўйича судьяси.

Кармана туманида судья ва ёшлар учрашуви ўтказилди

Давлатимизда барча жиноят ва ҳуқуқбузарликлар тўғрисидаги қонунларининг нормаларини янада либераллаштириш юзасидан изланишлар олиб бориш, шу жумладан вояга етмаганларнинг жиноят ишларини юритиш тўғрисидаги қонун меъёрларини янада такомиллаштириш, жиноят ишларини юритишда учрайдиган турли камчиликларга барҳам бериш бугунги куннинг долзарб талабидир.

Жиноят ишлари бўйича Кармана туман суди томонидан Кармана туманидаги 1-сонли умумтаълим мактабида “Вояга етмаганлар ўртасида ҳуқуқбузарликлар ва жиноятчиликни олдини-олиш масалалари” юзасидан мактабнинг битирувчи синф ўқувчилари билан учрашиб, суҳбат ўтказилди.

Мазкур учрашув давомида ўқувчи ёшларларнинг ҳаётда ўз ўринларини топишлари, соғлом турмуш тарзини ташкил қилиш ва ёт ғояларга берилмаслик борасида зарур маслаҳатлар бериб ўтилди ва бу борада суд амалиётидан мисоллар келтирилди.

Суҳбат давомида судьялар ёшларни қизиқтирган саволларига атрофлича жавоб беришди.

 

Жаҳонгир Каримов,

Жиноят ишлари бўйича Кармана туман судининг раиси. 

Skip to content