Кичик ва ўрта бизнес субъектлари учун янги имкониятлар жорий қилинмоқда
Сўнгги йилларда мамлакатимизда тадбиркорлик фаолиятини ривожлантириш, уларга янада қулай шарт-шароитлар яратиш борасида бир қатор самарали ислоҳотлар амалга оширилди.
Тадбиркорлик субъектлари учун имтиёз ва преференциялар қўллаш, уларни қўллаб-қувватлаш бўйича бир қатор норматив ҳуқуқий ҳужжатлар қабул қилинмоқда.
Хусусан, Ўзбекистон Республикаси Президентининг 2025 йил 19 март кунидаги ПФ-50-сон Фармони қабул қилиниши ҳам бунга яна бир мисол ҳисобланади.
Фармонга кўра, кичик ва ўрта бизнес субъектлари учун соддалашган маъмурий тартиб-таомилларни жорий қилиш назарда тутилди.
Жумладан, 2025 йил 1 июлдан бошлаб:
(а) 2028 йил 1 январга қадар кичик ва ўрта бизнес субъектлари зиммасига янги мажбуриятлар юклатилишини назарда тутадиган норматив-ҳуқуқий ҳужжатларни қабул қилишга мораторий эълон қилинади;
(б) тадбиркорлик субъектларига янги тартибга солиш воситаларини белгилашни ёки амалдагиларини кучайтиришни назарда тутувчи норматив-ҳуқуқий ҳужжатларга нисбатан «ягона санадан янги қоидалар» тамойили қўлланади ва ушбу нормаларнинг кучга кириш санаси 1 январь ёки 1 июль этиб белгиланади;
(в) 2028 йил 1 январга қадар «Биринчи имконият» тамойили жорий этилади ва унинг доирасида биринчи фаолият йили давомида савдо ва тадбиркорлик соҳаларига оид маъмурий ҳуқуқбузарликни илк бор содир этган кичик тадбиркорлик субъектлари маъмурий жавобгарликдан озод этилади.
(г) ушбу банднинг (а) ва (б) кичик бандлари талаблари фавқулодда ҳолатларни бартараф этиш, фуқароларнинг ҳаёти ва соғлиғига зарар етказиш билан боғлиқ ҳолатларнинг олдини олиш, қонунчилик ҳужжатларини Жаҳон савдо ташкилоти қоидаларига мувофиқлаштиришга қаратилган норматив-ҳуқуқий ҳужжатларга татбиқ этилмайди.
Бундан ташқари, Фармонга биноан, корхонани тугатишда солиқ текшируви ўтказилмайдиган ҳолатлар белгиланди.
Хусусан, 2025 йил 1 сентябрдан бошлаб қуйидаги мезонларга бир вақтнинг ўзида жавоб берувчи кичик ва ўрта бизнес субъектларининг фаолиятини ихтиёрий равишда тугатишда солиқ текшируви ўтказилмайди:
(а) охирги уч йилда товарларни (хизматларни) реализация қилишдан олинган жами даромади 10 миллиард сўмдан ошмаган;
(б) бюджет ва кредиторлар олдида қарздорлиги мавжуд бўлмаган ҳамда мунтзам равишда солиқ ҳисоботларини тақдим этаётган;
(в) «Хавфни таҳлил қилиш» электрон тизимида ҳуқуқбузарлик содир этиш хавфи паст даражада таснифланган.
Хулоса ўрнида шуни таъкидлаш жоизки, мазкур Фармоннинг қабул қилиниши кичик ва ўрта бизнес субъектларининг жадаллик билан ривожланиши учун қулай шарт-шароитлар яратишга хизмат қилади.
Турдиев Дилшод,
Учқудуқ туман иқтисодий судининг раиси