Матбуот хизмати - Навоий вилоят суди

Бола ҳуқуқлари қонун ҳимоясида !

Даъвогар З.И ва жавобгар С.Т нинг қонуний никоҳдан ўтмасдан оила қуриб, 2020 йил 20 июндан бошлаб бирга яшаб, турмушларидан икки нафар, фарзандлари бор.

Маълум бўлишича даъвогар жавобгар билан шаръий никоҳ асосида турмуш қуриб, “Чинобод” маҳалласи 26-уйга келин бўлиб тушган ва 2024 йил 25 март кунига қадар турмуш ўртоғи ва икки нафар фарзандлари билан шу уйда яшаган.

Тарафлар 2024 йил 25 март кунига қадар ушбу уйда бирга яшаган, кейинчалик тарафлар ўртасида бўлган оилавий келишмовчиликлар натижасида жавобгар М.Х даъвогар ва икки нафар фарзанди уй жойдан чиқариб юборган, жавобгар ва фарзандларини уйга киришига қаршилик кўрсатгани маълум бўлди.

Судда аниқланган ҳолатларга кўра жавобгар М.Х даъвогар уй жойга киритиб қўйишни сўраб судга даъво ариза билан мурожаат қилганидан кейин уй жойни фуқаро Д.Б га 2029 йил 29 апрель куни нотариус томонидан тасдиқланган олди сотди шартномасига асосан сотиб юборган.

Мазкур ҳолатда суд жавобгар М.Х нинг низоли уй жой бўйича судда иш кўрилаётган бир пайтда уй жойни сотиши даъвогарни уй жойга киритмаслик учун қилинган деб ҳисоблайди ва унинг бу ҳаракатини танқидий баҳолайди.

Судда аниқланган ҳолатларга кўра даъвогар турмуш ўртоғи билан яшаб келган уй жойга киришга ҳаракат қилиб келган, аммо оилавий жанжаллар сабабли никоҳ даврида яшаган уй жойга кириб яшашга имконият бўлмаган ва шунинг учун судга даъво ариза билан мурожаат қилган.

Ўзбекистон Республикаси “Бола ҳуқуқларининг кафолатлари тўғрисида”ги қонуни 19-моддасига кўра ҳар бир бола турар жойли бўлиш ҳуқуқига эга. Мазкур ҳуқуқ қонунчиликда белгиланган тартибда амалга оширилади.

Турар жой мулкдорининг ёки турар жойни ижарага олувчининг оила аъзолари бўлган болалар улар қаерда бўлишларидан қатъи назар, турар жой мулкдори ёки турар жойни ижарага олувчиси эгаллаб турган турар жойга нисбатан ҳуқуққа эга бўлади.

Суд иш ҳолатларидан ва юқорида қайд этилган қонун талабларидан келиб чиқиб, ҳозирги кунда даъвогар З.И ва унинг турмуш ўртоғи жавобгар М.Х ушбу уй-жой мулкдори бўлмасада, улар доимий шу уй жойда яшагани, икки нафар фарзандлари туғилгани, даъвогар уй жой рўйхатига киритилгани, жавобгар уни уй жойдан маҳрум этиш, мулкни бегоналаштириш мақсадида уй жойни сотгани, даъвогар З.И жавобгарнинг қаршилиги сабабли уй жойга кира олмаганлиги, икки нафар фарзандлари билан ижарада яшаётганлиги, уй жойда яшаш ва фойдаланиш хуқуқига эга эканлигини инобатга олиб, даъвогар З.И.ни икки нафар вояга етмаган фарзандлари билан Хатирчи туман ушбу уй-жойга киритиб қўйишни лозим деб ҳисоблади.

Баҳодир Бабақулов,

Фуқаролик ишлари бўйича Хатирчи туман суди раиси.

Нотинч ва ажрашиш арафасида турган оилалар муҳокамаси ўтказилди

Навоий вилоят суди ва Навоий вилоят оила ва хотин-қизлар бошқармаси билан ҳамкорлик тўғрисида имзоланган Мемарандумга асосан жорий йилнинг 10 май куни Кармана туманидаги “Хазора” маҳалласида Кармана тумани оила ва хотин-қизлар бўлими, Навоий вилоят суди судьялари, оқила аёллар аъзолари ҳамда хотин-қизлар фаоллари иштирокида тумандаги оилавий низолари бор, нотинч оилалар билан очиқ мулоқот ва учрашув тадбири ўтказилди.

Тадбирда 7 нафар нотинч оила аъзолари билан индивидуал суҳбатлашиб, никоҳдан ажратишнинг салбий оқибатлари, оила муқаддаслиги ва фарзанд тарбиясига эътиборсиз бўлмасликлари, жиддий асослар бўлмаганда никоҳдан ажрашиш мақсадга мувофиқ эмаслиги тўғрисида тушунтириш ишлари олиб борилди.

Натижада, 3 нафар ажрим ёқасидаги оилалар яраштирилишига эришилди ҳамда қолган оила аъзолари билан кейинчалик яна тушунтириш ишлари олиб бориш бўйича тегишли тавсилар берилди.

Азизжон Баҳронов,

Навоий вилоят судининг фуқаролик ишлари бўйича судьяси.

Сайёр қабул тафсилотлари

Навоий вилоят суди ҳамда Навоий вилоят маъмурий суди раисининг навбатдаги сайёр қабули Хатирчи туманининг «Дамариқ» маҳалласида бўлиб ўтди.

Сайёр қабулда вилоят суди раислари билан биргаликда Жиноят, Фуқарорлик ва Иқтисодий ишлар бўйича тегишли туманлараро, туман судлари раислари ва судьялари ҳам иштирок этишиб, фуқароларнинг суд-ҳуқуқ соҳасига доир бир қанча мурожаатлари тингланди.

Шунингдек, сайёр қабул давомида судлар томонидан сайёр суд мажлислари ҳам ўтказилди.

Бу каби сайёр қабуллар тасдиқланган режага асосан судлар томонидан доимий равишда ўтказилиб келинаётган бўлиб, бундан кўзланган асосий мақсад, фуқароларни узоқ вақт давомида ўз ечимини топмай келаётган суд-ҳуқуқ соҳасига доир муаммоларига қонуний ечим топиш орқали халқимизни рози қилиш ва қонун устуворлиги таъминлаш орқали одил судловга эришишидан иборатдур.

Навоий вилоят суди раиси А.Аллаев

Суд-ҳуқуқ тизимида амалга оширилган ислоҳотлар

Суд-ҳуқуқ тизимида амалга оширилган ислоҳотлар ҳамда Ўзбекистон Республикаси Жиноят, Фуқаролик Иқтисодий процессуал кодексларига киритилган ўзгартириш ва қўшимчаларнинг мазмуни, судларга мурожаат қилиш тартиби, фуқароларда қонунга ҳурматда бўлиш муносабатини шакллантириш, шунингдек улар ўртасида ҳуқуқбузарлик ва жиноятчиликнинг олдини олиш мақсадида Томди туманидаги 36-сон жазони ижро этиш муассасаси ходимлари иштирокида ҳуқуқий тарғибот тадбири ўтказилди.

Тадбирда судьялар суд-ҳуқуқ тизимидаги ислоҳотлар, суд қарорларига нисбатан шикоят қилиш тартиби ва муддатлари, коррупциявий жиноятлар содир қилинганлиги учун жавобгарлик ва жазо чоралари бўйича тушунтиришлар бериб ўтишди.

Шундан сўнг маърузачилар тадбир иштирокчиларининг саволлари ва мурожаатларига тегишли тушунтириш ва жавоб беришди.

Дилобар Эргашева,

Жиноят ишлари бўйича Томди туман суди раиси.

Биз – коррупцияга қаршимиз

Жамиятда аҳолининг ҳуқуқий билими ва маданиятининг юксак даражада бўлиши ҳамда шахснинг ўзга фуқаролар ҳуқуқ ва манфаатларини ҳурмат қилган ҳолда ўз ҳуқуқларини амалга ошириши ҳуқуқбузарлик ва жиноятчиликнинг одини олишдаги энг муҳим омиллардан биридир.

Албатта, ҳар бир фуқаронинг ҳуқуқий билими ва маданиятини юксалтиришга унинг ёшлигидан ўз оиласи ва мактаб таълими жараёнларидан бошлаш мақсадга мувофиқдир.

Ўқувчи ёшларнинг ҳуқуқий билим ва маданиятини янада ошириш, уларда қонунга ҳурматда бўлиш муносабатини шакллантириш, шунингдек ёшлар ўртасида ҳуқуқбузарлик ва жиноятчиликни олдини олиш мақсадида Зарафшон шаҳар ва Томди туман судлари ташаббуси билан Томди тумани ихтисослаштирилган мактаб интернатида “Биз – коррупцияга қаршимиз” мавзусида учрашув ташкил этилди.

Учрашув давомида ёшлар ўртасида коррупциянинг салбий иллат эканлиги ҳамда жамият ривожига тўсиқ бўлиши баён этилган иншолар ва расмлар танлови ўтказилганлиги билан аҳамиятли бўлди. Шунингдек, мазкур тадбир ёшларнинг жадидлар ҳаёти ва ижодига доир саҳна кўриниши билан давом эттирилди.

Ўтказилган иншолар ва расмлар танловида ғолиблар аниқланиб, тадбир якунида совриндорлар Зарафшон шаҳар ҳамда Томди туман судлари раислари томонидан эсдалик совғалари ҳамда дипломлар билан тақдирланди.

Учрашув давомида ўқувчи ёшларнинг ҳаётда ўз ўринларини топишлари, соғлом турмуш тарзини ташкил қилиш ва ёт ғояларга берилмаслик борасида зарур маслаҳатлар бериб ўтилди ва бу борада суд амалиётидан мисоллар келтирилиб, ёшларнинг қизиқтирган саволларига жавоблар берилди.

Анвар Шукуров,

Фуқаролик ишлари бўйича Зарафшон туманлараро суди раиси.

Қонунга риоя қилган тадбиркорлик субъектлари рағбатлантирилади

2024 йилнинг 23 январь куни Ўзбекистон Республикаси Президентининг “Тадбиркорлик субъектларининг барқарорлик рейтингини жорий этиш чора-тадбирлари тўғрисида”ги ПҚ-39-сонли қарори қабул қилинди.

Мазкур қарорни қабул қилишдан мақсад шуки, солиқларни ўз вақтида тўлаб, қонунчилик талабларига амал қилган ҳолда фаолият юритаётган тадбиркорлик субъектларига янада қулай шарт-шароитлар яратиш ва уларни рағбатлантириш демакдир.

Қарорга кўра, 2024 йил 1 февралдан қонунчилик талабларига риоя этган ҳолда фаолият юритаётган тадбиркорлик субъектларини аниқлаш ва қўшимча рағбатлантиришни назарда тутувчи Тадбиркорлик субъектларининг барқарорлик рейтингини жорий этиш белгиланди.

Рейтинг доирасида тадбиркорлик субъектлари қуйидаги тоифаларга ажратилади:

“ААА” (96-100 балл), “АА” (91-95) ва “А” (86-90) тоифалар — юқори барқарорлик рейтинги;

“BBB” (76-85), “BB” (66-75) ва “B” (56-65) тоифалар — ўрта барқарорлик рейтинги;

“CCC” (51-55), “CC” (36-50) ва “C” (26-35) тоифалар — қониқарли барқарорлик рейтинги;

“D” (25 гача) тоифа — қуйи барқарорлик рейтинги.

Рейтинглар Солиқ қўмитасининг “Тадбиркорларнинг барқарорлик рейтинги» электрон платформасида идоралараро ахборот алмашинуви воситасида автоматик тарзда (онлайн) шакллантирилади ва Савдо-саноат палатасининг расмий веб-сайтида эълон қилиб борилади.

Ушбу қарор билан юқори барқарорлик рейтингидаги тадбиркорлик субъектлари учун бир қатор имтиёзлар ва рағбатлантиришлар жорий этилиши қайд этилди.

Жумладан, “ААА” тоифадаги тадбиркорлик субъектлари фаолиятида солиқ текширувлари ўтказилмайди (жиноий ишлар доирасида ўтказиладиган текширувлар бундан мустасно), шунингдек, ушбу тоифадаги тадбиркорлик субъектларига қўшилган қиймат солиғи суммаси ўрнини қоплаш (қайтариш) бир кун муддатда текширувларсиз амалга оширилади;

4 ва 5-тоифадаги туманларда фаолият юритаётган “АА” ва ундан юқори тоифадаги тадбиркорлик субъектларига бўлиб-бўлиб тўлаш шарти билан сотилган давлат активлари ва қишлоқ хўжалигига мўлжалланмаган ер участкалари бўйича дастлабки тўлов суммаси 35 фоиздан кам бўлган ҳолларда қолган суммага Марказий банкнинг асосий ставкаси миқдорида йиллик фоизлар ҳисобланмайди ҳамда бўлиб-бўлиб тўлаш муддати миқдоридан қатъи назар, 7 йил (тенг улушларда) этиб белгиланади;

“А” ва ундан юқори тоифадаги тадбиркорлик субъектларига эса, солиқлар бўйича (қўшилган қиймат солиғи бундан мустасно) мавжуд ортиқча тўлов суммасини қайтариш уч кун муддатда амалга оширилади.

Рағбатлантириш чоралари давлат улуши 50 фоиз ва ундан юқори бўлган давлат корхоналари ва компанияларига татбиқ этилмайди.

Ушбу қарор билан, 2024 йил 1 апрелдан тадбиркорлик субъектларига субсидия, имтиёз ва преференциялар уларнинг рейтинг даражасидан келиб чиққан ҳолда жорий этилиши белгиланди.

Шунингдек, мазкур қарор ижросини таъминлаш мақсадида Вазирлар Маҳкамасининг 2024 йил 30 январдаги 55-сон қарори билан “Тадбиркорлик субъектларининг барқарорлик рейтингини аниқлаш тартиби тўғрисида”ги Низом қабул қилиниб, ушбу Низом тадбиркорлик субъектларининг барқарорлик рейтингини аниқлаш ва юритиш тартибини белгилайди.

Хулоса ўрнида шуни таъкидлаш жоизки, мазкур ҳужжатларнинг қабул қилиниши – солиқларни ўз вақтида тўлаб, қонунчилик талабларига амал қилган ҳолда фаолият юритаётган тадбиркорлик субъектларининг келгусидаги фаолиятида муҳим ўрин тутади.

Дилшод Турдиев,

Учқудуқ туман иқтисодий суди раиси.

ҚИЗИЛТЕПA ТУМAНИДA ОИЛAВИЙ НИЗОЛAР МУҲОКAМAСИ ЎТКAЗИЛДИ

Ҳафтанинг жума кунига мўлжалланган Оилавий ажримларни олдини олиш ва низоли оилалар билан ишлаш куни дастури доирасида 4-сектор ҳудудидаги 6 нафар ажрим ёқасига келиб қолган ва низоли оила вакиллари билан оилавий низоларни бартараф етиш муҳокамаси ўтказилди.

Муҳокама жараёнига туман оила ва хотин-қизлар бўлими, фуқаролик ишлари бўйича Кармана туманлараро суди судяси, «Нуронийлар» жамғармаси вакили, туман бош имом-хатиби ҳамда «Оқила аёллар»ҳаракати етакчилари, отинойилар иштирок етиб низоли оила вакилларига оила муқаддаслиги ва фарзанд тарбиясига беъэтибор бўлмаслиги тўғрисида тушунтириш ишлари олиб борилди.

Олиб борилган сай-ҳаракатлар натижасида 2 нафар оилаларнинг яраштирилишига еришилди ва 4 нафар оилага ўйлаб кўришлари учун маълум мухлатлар берилди.

Шерали Очилов,

Фуқаролик ишлари буйича Кармана туманлараро судининг судьяси.

А Х Б О Р О Т

Одил судлов фаолиятининг очиқ-ошкоралигини таъминлаш ҳамда фуқароларнинг суд ҳокимиятига ишончини мастаҳкамлашда жамоатчиликнинг, шу жумладан, халк маслаҳатчиларининг суд ишларида фаол иштироки муҳим аҳамиятга эга.

Шу муносабат билан, Навоий вилоят судлари судьялари малака ҳайъати томонидан Ўзбекистон Республикаси Қонуни билан тасдиқланган “Судьяларнинг малака ҳайъатлари тўғрисида”ги Низомнинг 8-бобида белгиланган тартибга риоя этган ҳолда 2024 йилнинг май ойида жойлардаги ҳокимликлар ва фуқароларнинг ўзини ўзи бошқариш органлари билан ҳамкорликда вилоят ва туман (шаҳар) судларига халқ маслаҳатчилари сайлови ташкил этилди.

Унга кўра, жорий йилнинг 6-10 май кунларида Навоий вилоят судининг жиноят ишлари бўйича судлов ҳайъатига 22 нафар ҳамда жиноят ишлари бўйича туман (шаҳар) судларига 78 нафар, жами 100 нафар халқ маслаҳатчиси очиқ овоз бериш йўли билан икки ярим йил муддатга сайланди.

Навоий вилоят суди матбуот хизмати

Халқ дардаги ҳамнафас бўлмоқ бугунги куннинг талади

Халқни дарду-ташвишини тинглаб уларга ечим топиш, фуқароларни қийнаб келаётган муаммоларни жойида ҳал қилиш бугунги кунда ҳар бир ташкилотнинг ўз функцияларидан келиб чиққан ҳолда олдига қўйилган вазифалардан бири ҳисобланади.

Шу аснода Навоий вилоят суди ҳамда Навоий вилоят маъмурий суди раислари жойларда доимий равийшда сайёр қабуллар ўтказиб келмоқдалар.

Навбатдаги ана шундай сайёр қабул Навоий шаҳар фуқаролари учун “Гулзор” маҳалласи биносида ташкил этилди.

Сайёр қабулда вилоят суди раислари билан биргаликда Жиноят, Фуқарорлик ва Иқтисодий ишлар бўйича тегишли туман, шаҳар судлари раислари ва судьялари ҳам иштирок этишиб, фуқароларнинг суд-ҳуқуқ соҳасига доир бир қанча мурожаатлари тингланди.

Жумаладан, сайёр қабул давомида жами 16 нафар фуқаро қабул қилиниб, шундан 3 нафар фуқароларнинг мурожаатлари ижобий ҳал этилган бўлса, 13 нафар фуқароларга тегишли тартибда ҳуқуқий тушунтиришлар берилди.

Шунингдек, сайёр қабул давомида судлар томонидан сайёр суд мажлислари ҳам ўтказилиб, Жиноят ишлари бўйича Навоий шаҳар суди томонидан ИИБнинг тақдимномасига асосан Пробация гуруҳида ҳисобда туриб жазо ўтаб келаётган 3 нафар маҳкумлар ўталмаган жазодан Ўзбекистон Республикаси Жиноят кодексининг 73-моддасига асосан муддатидан илгари шартли озод қилинди.

Фуқаролик судлари томонидан 4 нафар фуқаронинг тўланмаган иш ҳақини ундириш бўйича даъволари қаноатлантирилиб, улар фойдасига 31.960.000 сўм иш ҳақи ундирилган бўлса, 1 нафар фуқаронинг алмент миқдорини камайтириш юзасидан даъво аризаси қаноатлантирилди, 15 та иш бўйича тўланмаган кредит пулларини ундириш белгиланди.

Иқтисодий судлар томонидан даъвогарлар фойдасига 304.344.600 сўм ундирилди.

Бу каби сайёр қабуллар тасдиқланган режага асосан судлар томонидан доимий равишда ўтказилиб келинаётган бўлиб, бундан кўзланган асосий мақсад, фуқароларни узоқ вақт давомида ўз ечимини топмай келаётган суд-ҳуқуқ соҳасига доир муаммоларига қонуний ечим топиш орқали халқимизни рози қилиш ва қонун устуворлиги таъминлаш орқали одил судловга эришишидан иборатдур.

Вилоят суди раиси А.Аллаев.

Оила муқаддас, уни сақлаб қолиш барчамизни бирдек бурчимиз

Навоий вилоят суди ва Навоий вилоят оила ва хотин-қизлар бошқармаси билан ўзаро ҳамкорлик тўғрисида имзоланган Мемарандумга асосан Кармана туманидаги “Мир Саид Бахром” МФЙ биносида Кармана тумани оила ва хотин-қизлар бўлими, вилоят оила ва хотин-қизлар бошқармаси масъуллари, Навоий вилоят суди судьялари, оқила аёллар аъзолари ҳамда маҳалладаги хотин-қизлар фаоллари иштирокида тумандаги оилавий низолари бор, нотинч оилалар билан очиқ мулоқот ва учрашув тадбири ўтказилди.

Тадбирда 9 нафар нотинч оила аъзолари билан индивидуал суҳбатлашиб, никоҳдан ажратишнинг салбий оқибатлари тушунтирилди.

Натижада, 3 нафар ажрим ёқасидаги оилалар яраштирилишига эришилди ҳамда қолган оила аъзолари билан кейинчалик яна тушунтириш ишлари олиб бориш бўйича тегишли тавсилар берилди.

Азизжон Баҳронов,

Навоий вилоят судининг фуқаролик ишлари бўйича судьяси.