Қидирув:

Бахтли оила жамият равнақи

Жорий йилнинг 28 февраль куни Навоий вилоят “Бахт қасри” маркази ташаббуси билан Навоий давлат педагогика институти физика факультетида Халқ депутатлари Навоий вилоят Кенгаши ҳузуридаги нодавлат ва нотижорат ташкилотларини ва фуқаролик жамияти бошқа институтларини қўллаб-қувватлаш жамоат фондининг “Соғлом оила-соғлом жамият” лойиҳасига ажратилган маблағлар ҳисобидан, Ўзбекистон Республикаси Вазирлар Маҳкамасининг 2020 йил 31 декабрдаги “Оила институтини янада ривожлантириш ва ёшларни оилага тайёрлаш тўғрисида”ги 820-сонли қарори ижросини таъминлаш, оилаларни мустаҳкамлаш бўйича, энг аввало, “Соғлом оила — соғлом жамият” консептуал ғоясини ҳаётга татбиқ этишга йўналтирилган ягона давлат сиёсатини олиб бориш мақсадида Навоий вилоят суди, Навоий давлат педагогика институти, Навоий шаҳар диний қўмитаси, Навоий вилоят ҳокимлиги ҳузуридаги ФЎЎБОМО ўқув маркази, вилоят Аҳоли репродуктив саломатлик маркази, Навоий шаҳар ФХДЁ бўлими ҳамда шаҳар Оила ва хотин-қизлар бўлими ҳамкорликда оила қуриш арафасида турган ва никоҳланаётган ёшлар учун оилавий хаёт психологияси, оилада диний ва аҳлоқий тарбия, оилавий-ҳуқуқий муносабатлар, репродуктив саломатлик, оила бюджети ва иқтисоди, ота-оналикнинг ижобий кўникмалари каби ўқув дастурида белгиланган машғулотлар ўтилди.

Шунингдек, ўқув машғулотлари сўнгида иштирокчиларга сертификатлар топширилди.

 

Гулнафис Худайбердиева,

Навоий вилоят суди судьяси.

 

Истам Турдиев,

Навоий вилоят суди судьяси.

Ижара қарздорлиги суд тартибида ундириши белгиланди

Фуқаролик ишлари бўйича Хатирчи туман суди 2024 йил  20 февраль куни “Хатирчи деҳқон бозори” МЧЖнинг жавобгар фуқаролар манфаатида қарздорликни ундириб бериш ҳақидаги даъвоси кўриб чиқилди.

Аниқланишича, Хатирчи туман ҳокимининг 2018 йил 04 сентябрь кунидаги №Қ-4270 сонли қарорига асосан, Хатирчи тумани “Навбахор” МФЙда жойлашган “Хатирчи деҳқон бозори” МЧЖга қарашли бинолар эгаллаб турган 24652.0 кв.метр ер майдони доимий фойдаланишга бириктирилиб, ушбу биноларга “Хатирчи деҳқон бозори” МЧЖ номига эгалик ҳуқуқи берилган.

Ўзбекистон Республикаси Ер Кодексининг 31-моддасига кўра юридик ва жисмоний шахсларнинг ер участкасига бўлган ҳуқуқи жойнинг ўзида чегаралар белгиланганидан, ер участкаларининг планлари (чизмалари) ва тавсифлари тузилиб, ер участкаларига бўлган ҳуқуқ давлат рўйхатига олинганидан кейин вужудга келади.

Туман ҳокимининг мазкур қарорига асосан Ер тузиш ва кўчмас мулк кадастри Хатирчи филиали томонидан 06.09.2018 йилда “Хатирчи деҳқон бозори” МЧЖ номига, ер участкасига бўлган ҳуқуқнинг давлат рўйхатидан ўтказилганлиги тўғрисида NA00152293 сонли, бинолар, иншоотлар ва кўп йиллик дарахтларга бўлган ҳуқуқнинг давлат рўйхатидан ўтказилганлиги тўғрисида NA0028841 сонли гувоҳномалар берилган.  

Навоий вилоят ҳокимининг  2019 йил 8 февралдаги 24-Қ-сонли қарорининг 1-иловасига асосан бозорлар ва савдо комплексларининг маъмурияти томонидан ундириб олинадиган бир марталик йиғимлар, ижара тўлови ва кўрсатилган хизматлар қийматининг миқдорлари белгиланган бўлиб, унга кўра ноозиқовқат махсулотлари сотиш ҳисобланишини керак бўлган ижара тўлови (Учқудуқ, Қизилтепа, Хатирчи, Навбахор туманлари учун) 1 кв.м/ойига 23.000 сўм қилиб белгиланган.

Шундай бўлсада, 22 нафар фуқаро 2021, 2022, 2023 йиллар давомида жами 616.770.000 сўмлик ижара тўловларини “Хатирчи деҳқон бозори” МЧЖга тўламасдан келган.

Суд юқорида қайд этилган қонун талаблари ва судда аниқланган ҳолатларга кўра, 22 нафар жавобгарлардан 2021, 2022, 2023 йиллар давомида тўланмасдан келган ижара тўловларидан бўлган  жами 616.770.000 сўм қарздорликни “Хатирчи деҳқон бозори” МЧЖ фойдасига ундириши белгиланди.

         Шу орқали, 2021, 2022, 2023 йиллар давомида тўланмсадан келинган ижара тўловлари “Хатирчи деҳқон бозори” МЧЖнинг фойдасига ундириши таъминланди.

 

Баҳодир Бабақулов,

Фуқаролик ишлари бўйича Хатирчи туман суди раиси. 

Меҳнат қонунчилиги амалда қўлланилмоқда!!!

Фуқаролик ишлари Хатирчи туман судига жорий йилнинг февраль ойида ундирувчи Хатирчи туман адлия бўлими томонидан фуқаролар манфаатида қарздор Хатирчи туман Ирригация бўлимига нисбатан тўланмай қолган устама пулларини ундириш бўйича 57 нафар фуқаронинг манфаатида судга киритилган аризалари кўриб чиқилди.

Мазкур ишлар ўрганилганда қарздор Хатирчи туман Ирригация бўлими томонидан қонунбузилиш ҳолатларига  йўл қуйилиб, Ўзбекистон Республикаси Меҳнат кодексида белгиланган иш берувчининг мажбуриятлари бажарилмасдан келинган.

Вахоланки, Ўзбекистон Республикаси Вазирлар Маҳкамасининг 2021 йил 17 сентябрдаги 573-сонли Қарори билан тасдиқланган “Ўзбекистон Республикаси сув хўжалиги Вазирлиги тўғрисида”ги Низомда ходимларга  ойлик иш ҳақлари билан бирга қўшимча тарзда устама ва рағбатлантирилиши белгиланганлиги, Низомнинг 2-бандида эса давлат бошқарувчи органлари хизматчилари учун қонунчиликда белгиланган миқдорда лавозим маошига устамалар Ўзбекистон Республикаси Давлат бюджет маблағлари ҳисобидан тўланиши лозимлиги белгиланган.

Бундан ташқари, Вазирлар Маҳкамасининг 1997 йил 03 июлдаги “Давлат хизматчиларининг лавозим маошларига йигирма фоизли устама ҳақ белгилаш тўғрисида”ги 339-сон Қарорига кўра давлат хизматчиларининг лавозимлар рўйхатига мувофиқ 1997 йил 1 июлдан бошлаб бюджет маблағ билан таъминланадиган давлат ҳокимияти ва бошқарув органлари  ва судларнинг давлат хизматчилари лавозим маошларига 20 фоизли устама ҳақ белгиланган.

Шунингдек, Ўзбекистон Республикаси Меҳнат кодексининг 244-моддасида иш берувчининг ўз молиявий аҳволидан қатъий назар, қонунчиликда меҳнат ҳақидаги бошқа ҳуқуқий ҳужжатларда, меҳнат шартномасида белгиланган меҳнатга ҳақ тўлаш шартларига мувофиқ ходимлар томонидан бажарилган иш учун ҳақ тўлашни амалга ошириш мажбуриятини мустаҳкамлаб қўйиш шартлиги кўрсатиб ўтилган.

Натижада мазкур аризалар қаноатлантирилиб, 57 нафар фуқаронинг фойдасига Хатирчи туман Ирригация бўлимидан 572.509.392 (беш юз етмиш икки миллион, беш юз тўққиз минг, уч юз тўқсон икки) сўм устама пуллари фуқаролар фойдасига ундириб бериш белгиланди.

Бундан кўринадики, 57 нафар фуқаронинг устама пуллари йиллар давомида тўланмасдан келинганлиги, уларнинг бу ҳуқуқлари ташкилот томонидан паймол қилиб келинган.

 

Зарифжон Утамуродов,

Фуқаролик ишлари бўйича Хатирчи туман суди судяси.

Навбаҳор туманида суд раислари томонидан навбатдаги сайёр қабул ўтказилди

Юртимизда амалга оширилаётган кенг кўламли ислоҳотларнинг самараси, тинчлик ва тараққиётнинг асосий гарови ҳам Конституция ва қонун устуворлигини таъминлаш билан бевосита боғлиқдир. Шунинг учун ҳам ҳаётимизнинг барча соҳа ва тармоқларида меҳнат қилаётган инсонлар, биринчи навбатда, раҳбар ходимлар, фуқароларнинг Конституция ва қонунлар ижросини тўғри ташкил этиши, бу қоидаларга бутун жамият аъзолари қатъий амал қилиши шарт бўлган муҳитни яратиш ғоят муҳим ва долзарб вазифага айланиб бормоқда.

Мамлакатимизда жадал суръатлар билан олиб борилаётган ўзгариш ва янгиланишлар негизида, авваламбор, Конституциямизда белгиланган давлат органларининг халқ манфаатларига хизмат қилиши лозимлиги ҳақидаги қоидани амалда татбиқ этишдек эзгу мақсад мужассам экани ҳам айнан шуни тақозо этмоқда.

Конституция ва қонун устуворлигини таъминлаш мақсадида фуқароларнинг мурожаатларини жойида ўрганиш ва ҳал этиш масаласига ҳам алоҳида эътибор қаратилган.

Фуқаролар  ва тадбиркорлик субъектлари муаммолари билан  ишлаш, ечимини кутаётган масалаларни «маҳаллабай» ўрганган ҳолда жойида ва тезкор ҳал этиш буйича Навбаҳор туман судлари раислари томонидан 2024 йилнинг биринчи ярмида ўтказиладиган сайёр қабуллар режасига мувофиқ, 2024 йил 27 февраль куни Навбаҳор тумани “Қоражон” маҳалла фуқаролар йиғинида жиноят ишлари бўйича Навбаҳор туман суди, фуқаролик ишлари бўйича Навбаҳор туманлараро суди ва Навбаҳор туманлараро иқтисодий суди раислари иштирокида навбатдаги сайёр қабул ўтказилди.

Сайёр қабулда ўн тўрт нафар фуқароларнинг оғзаки мурожаатлари тингланиб, белгиланган тартибда тушунтириш берилиб жойида бартараф этилди.

Шунингдек учрашув давомида, ҳудудда жиноятчилик ва ҳуқуқбузарликларни олдини олиш, ўғирлик, фирибгарлик, одам савдоси, коррупцияга оид жиноятлар учун жазонинг муқаррарлиги ҳақида фуқароларга тушунтиришлар берилди.

 

Алишер Сайдуллаев,

Жиноят ишлари бўйича Навбаҳор туман судининг раиси.

Ўзбекистонда коррупцияга қарши курашиш сиёсати

Коррупцияга қарши кураш бугунги кундаги дунё ҳамжамияти олдида турган энг долзарб масалалардан бирига айланди. Унинг давлатлар, минтақа иқтисодиёти, сиёсати, ижтимоий ҳаёти учун ҳалокатли таъсирга эга эканлигини жонли мисоллар орқали бир нечта мамлакатлар инқирозида кўришимиз мумкин.

Шу боисдан сўнгги йилларда хорижий давлатларда бўлиб ўтган Парламент ва Президентлик сайловларида ҳам сиёсий партиялар коррупцияга қарши курашишни ўзларининг энг муҳим йўналишлари сифатида кўрсатишмоқда

Коррупцияга қарши курашиш Ўзбекистонда ҳам давлат сиёсатининг энг устувор йўналишига айланди. Буни сўнгги йиллларда соҳага оид қабул қилинган концептуал аҳамиятга эга норматив-ҳуқуқий ҳужжатлар, коррупцияни олдини олишга қаратилган маъмурий ислоҳотлар мисолида ҳам кўришмиз мумкин.

Хусусан, мазкур йўналишдаги ишларни тизимли ва комплекс давом эттириш учун 2021-2025 йилларга мўлжалланган Коррупцияга қарши курашиш миллий стратегиясини ишлаб чиқиш белгиланган.

Ушбу стратегияни ишлаб чиқишда реал вазиятни тўлиқ қамраб олган яхлит ва бир бутун режа бўлишига алоҳида эътибор қаратилмоқда. Беш йилга мўлжалланган комплекс дастурий ҳужжатни ишлаб чиқиш ва уни амалга ошириш жараёнида муваффақиятли натижага эришган давлатлар тажрибаси ўрганилмоқда. Эътиборли жиҳати, аксар давлатлар коррупцияга қарши курашишда шу каби стратегик комплекс ҳужжатларни қабул қилиш ва ундаги вазифаларни тизимли тадбиқ этиш орқали сезиларли ижобий натижага эришмоқда.

Грузия, Эстония, Греция каби давлатлар тажрибаси шуни кўрсатадики, узоқ муддатга мўлжалланган комплекс дастур коррупцияга қарши курашиш ва унинг олдини олиш самарадорлигини оширишга ҳамда халқаро рейтинглардаги ўрнининг кўтарилишига хизмат қилган.

Юртимизда ҳам коррупцияга қарши курашишда айнан узоқ муддатни кўзлаган ҳолда тизимли, комплекс ишлаб чиқилган дастур ишлаб чиқилиши ва амалга оширилиши келгусида бу борадаги ислоҳотлар самарадорлигини оширишга хизмат қилганди

Асосийси, бугун жамиятимизда уйғонаётган коррупцияга нисбатан муросасизлик кайфиятини, журналист ва блогерлардаги коррупцияга қарши жанговар руҳни, давлат идоралари ва мансабдор шахсларидаги коррупция мамлакат келажагига ғов сифатида қарашни янада кучайтириш лозим.

 

Санжар Хайдаров,

Жиноят ишлари бўйича

Учқудуқ туман суди девонхона мудири.

Ёшлар билан самимий учрашув

Ўқувчи ёшларнинг ҳуқуқий билим ва маданиятини янада ошириш, уларда қонунга ҳурматда бўлиш муносабатини шакллантириш, шунингдек ёшлар ўртасида ҳуқуқбузарлик ва жиноятчиликнинг олдини олиш мақсадида суд ва ҳуқуқни муҳофаза қилувчи органлар ҳамда шаҳар халқ таълими бўлими ўртасида тузилган Меморандум ижросини таъминлаш мақсадида Зарафшон шаҳар судлари раислари томонидан Зарафшон шаҳридаги 8-умумий таълим мактаби ўқувчилари иштирокида “Касбим – келажагим”, “Инсон ҳуқуқлари – олий қадрият” мавзуларида “Судья ва ёшлар” учрашуви ташкил этилди.

Мазкур учрашув давомида ўқувчи ёшларларнинг ҳаётда ўз ўринларини топишлари, соғлом турмуш тарзини ташкил қилиш ва ёт ғояларга берилмаслик борасида зарур маслаҳатлар бериб ўтилди ва бу борада суд амалиётидан мисоллар келтирилди. 

 

Шерзод Ғофуров,

Зарафшон туманлараро иқтисодий суди раиси.

Зарафшон шаҳридаги “Олтин водий” маданият саройида жиноят ишлари бўйича Зарафшон шаҳар, Учқуду ҳамда Томди туман судлари томонидан жиноят ҳамда ҳуқуқбузарлик содир этишга мойиллиги бўлган шахслар ҳамда уюшмаган ёшлар иштирокида сайёр суд мажлислари ўтказилди

Сайёр суд мажлисида жиноят ва маъмурий ҳуқубузарлик содир этган бир нечта шахсларга нисбатан бўлган жиноят ва маъмурий ҳуқуқбузарликка оид ишлари кўриб чиқилиб, сайёр суд мажлиси иштирокчилари гувоҳлигида суд қарорлари эълон қилинди.

Бундай сайёр суд мажлисларини ўтказишдан кўзланган асосий мақсад, жиноят кўчасига кириб қолган ёки жиноят содир этишга мойиллиги бўлган бази фуқароларга жиноят учун жазо муқаррарлигини эслатиш ва шу орқали келиб чиқиши мумкин бўлган салбий оқибатларни олдини олишдан иборатдир.

Сайёр суд мажлиси якунига уланиб кетган тарғибот тадбирида сўзга чиққанлар, суд–ҳуқуқ соҳасидаги ислоҳотлар, шунингдек, жиноятчилик ва ҳуқуқбузарликларни олдини олиш борасида қилинаётган барча ишлар, қабул қилинаётга қонунлар барчаси “Инсон қадри ва манфаатлари учун” эканлиги, буни ҳар–бир Ўзбекистон фуқароси ич–ичидан ҳис қилиши ва жиноятчиликка қарши биргаликда муросасиз курашиш лозимлиги таъкидланди.

Шунингдек, йиғилганларга судьялар томонидан янги таҳрирдаги Ўзбекистон Республикаси Конституциясининг мазмун моҳияти, Коррупция ва одам савдосига қарши курашиш, бундай жиноятлар учун қонунчиликда назарда тутилган жазо чоралари ҳақида батафсил тушунтириш берилди.

  Тадбир сўнгида судьялар томонидан иштирокчиларга ўзларини қизиқтирган ҳуқуқий соҳага оид саволларига атрофлича жавоб берилди.

 

Анвар Исоков,

Жиноят ишлари бўйича Зарафшон шаҳар суди раиси.

Учқудуқ туманида хотин-қизлар жиноятчилигини олдини олиш ва унга қарши курашиш чоралари кўрилмоқда

Жиноят ишлари бўйича Учқудуқ туман суди раиси А.Курбонов,  туман ички ишлар бўлимининг ўринбосари ва хотин-қизлар масалалари бўйича туман ҳокими ўринбосари иштирокида, хотин-қизлар ўртасида жиноятчиликнинг олдини олиш мақсадида навбатдаги профилактик тарғибот ишлари олиб борилди.

Жумладан туман судининг раиси сўзга чиқиб, Давлатимиз раҳбарининг мамлакатимизда ҳуқуқбузарлик профилактикаси ва жиноятчиликка қарши курашиш борасида белгиланган вазифалар ижроси, мавжуд муаммолар ва уларни ҳал этиш масалаларига алоҳида эътибор қаратилмоқда.

Хусусан, Учқудуқ туманида ҳам аҳоли айниқса хотин-қизлар жиноятчилиги ва ҳуқуқбузарлигини барвақт олдини олишга доир кенг қамровли ишлар амалга оширилмоқда.

Жумладан, аҳоли орасида оила турмуш доирасида ҳуқуқбузарлик содир этган фуқаролар олиб борилиши лозим бўлган профилактик ишлар ва ажрим ёқасига келиб қолган оилалар билан тизимли ишлашни йўлга қўйиш, соғлом турмуш тарзини тарғиб қилиш, улар ўртасида ҳуқуқбузарлик ва жиноятчиликни барвақт олдини олиш ҳамда турли салбий иллатларга қарши курашишга доир сўз юритилди. Тазйиқ ва зўравонликка учраган хотин-қизларга “Ҳимоя ордери” бериш тартиби тушунтирилди.

Шунингдек, хотин-қизларнинг мавжуд муаммолари жойида ўрганилиб, уларни манзилли бартараф этиш чоралари кўрилди.

Хулоса ўрнида шуни айтиш лозимки, жамиятимизнинг кўрки бўлган аёлнинг нозик қўлларига кишан эмас, гул, қалбига эса ёвузлик эмас, эзгулик ярашади. Шу боис аёлларнинг жиноятга қўл урушини олдини олиш фақат ҳуқуқ-тартибот идоралари ёки тегишли ташкилотларнинггина эмас, ҳаммамизнинг вазифамизга айланиши лозим дея сўзига якун ясаб, йиғилиш қатнашчиларига мавзуга оид берилган саволларга батафсил жавоблар берилди.

 

Акмал Курбонов,

Жиноят ишлари бўйича Учқудуқ туман суди раиси. 

Ғозғон шaҳридa aжрим ёқaсидaги низоли оилaлaр муаммоларини судгача ҳал қилиш юзасидан муҳокaмaлар ўтказилди

Ғозғон шаҳридаги “Гулистон” маҳалласида “Оилавий ажримларни олдини олиш ва низоли оилалар билан ишлаш” куни муносабати билан ажрим ёқасидаги ҳамда низоли оилалар хотин-қизларининг муаммоларини ўрганиш ва амалий ёрдам бериш мақсадида фуқаролик ишлари бўйича Навбаҳор туманлараро суди судьялари, Оила ва хотин-қизлар бўлими, Aдлия бўлими бошлиғи, “Оқила аёллар” ҳаракати аъзолари, отинойилар ҳамда фаоллар иштирокида манзиллий учрашув ўтказилди. 

Учрашув давомида 2 нафар ажрим ёқасидаги ва 2 нафар низоли оилалар муҳокама қилиниб, ярашиб кетишлари учун вақт белгиланиб, хотин-қизларга шу каби салбий ҳолатларни олдини олиш мақсадида керакли тавсиялар берилди.

 

Ғайрат Якубов,

Фуқаролик ишлари бўйича Навбаҳор туманлараро суди судьяси.

“Менинг ҳуқуқим” мавзусида давра суҳбати ўтказилди

Навоий вилояти юридик техникумида “Ёшлар ва бизнесни қўллаб-қувватлаш” йили муносабати билан ёшларимиз учун бир қатор тадбирлар, учрашувлар ва семинарлар ташкил қилинмоқда.

Ёшларнинг ҳуқуқий онг ва ҳуқуқий маданиятини янада юксалтириш ҳамда уларнинг ҳуқуқларини тушунтириш мақсадида “Менинг ҳуқуқларим” мавзусида давра суҳбати ўтказилди.

Савол-жавобларга бой ўтган мазкур давра суҳбати Жиноят ишлари бўйича Навоий шаҳар судьялари ҳамда техникумнинг ҳуқуқшунослик ўқитувчилари томонидан олиб борилди.

 

Дилобар Пардаева,

Жиноят ишлари бўйича Навоий шаҳар суди судьяси.

Skip to content